भाग्यले ठगे पनि हिम्मतले जितेको रत्नबहादुर तामाङको प्रेरणादायी जीवन कथाकाठमाडौं । मास्टरसेफ इन्डिया २०२६ को अडिसनमा यतिबेला एक नेपाली युवाको असाधारण संघर्ष र प्रतिभाले सबैको ध्यान खिचेको छ। उनी हुन्— सिन्धुपाल्चोकका रत्नबहादुर तामाङ। दुवै हात गुमाइसकेका रत्नले कृत्रिम (Artificial) हातको सहारामा जजहरूका अगाडि लाइभ नुडल्स तयार पारेर खुवाउँदा विश्वप्रसिद्ध भारतीय सेफहरू समेत भावुक बनेका छन्।
रत्नको आँट, आत्मविश्वास र सीप देखेर मास्टरसेफका जज तथा विश्वप्रसिद्ध सेफ विकास खन्नाले
“जसले मन जित्यो, उसले अरु के इनाम जित्नुपर्छ र?”
भन्दै खुलेर प्रशंसा गरे। रत्नले आफ्नो अद्भुत प्रदर्शनका कारण मास्टरसेफको प्रतिष्ठित एप्रोन र चक्कु समेत जित्न सफल भएका छन्।
दुर्घटनाले बदलेको जीवन
रत्नबहादुरको जीवन २०७२ सालमा एकाएक मोडियो। साउदी अरबबाट छुट्टीमा घर आएका बेला वेल्डिङको काम गर्दा हाइटेन्सन लाइनको करेन्ट लागेर उनले दुवै हात गुमाए। हात मात्र होइन, दुर्घटनापछि प्रेमिकाले पनि साथ छोडिन्।
“त्यो बेला मसँग दुई विकल्प थिए— आत्महत्या गर्ने कि भीख माग्ने,” रत्न सम्झिन्छन्, “तर मैले तेस्रो बाटो रोजेँ— संघर्षको बाटो।”
टिकटकदेखि मास्टरसेफसम्म
जीवनले दिएको पीडालाई हारमा परिणत गर्न नदिएका रत्नले सामाजिक सञ्जालमार्फत नयाँ यात्रा सुरु गरे। टिकटक र अन्य प्लेटफर्ममा उनले बनाएका खानाका भिडियोहरूले लाखौँ दर्शकको मन जिते। त्यहीँबाट जुटेको सहयोगले उनले कृत्रिम हात जडान गर्न सके।
साउदी अरबमा तीन वर्ष सेफको रूपमा काम गरेको अनुभवलाई उनले कृत्रिम हातको माध्यमबाट पुनः जीवित पारे। आज त्यही अनुभव र संघर्षको कथा लिएर रत्न भारतको सबैभन्दा ठूलो कुकिङ रियालिटी शो मास्टरसेफ इन्डिया मा संसारभरका प्रतिस्पर्धीलाई चुनौती दिइरहेका छन्।
रत्नबहादुर तामाङको कथा केवल एक कुकिङ प्रतियोगिताको मात्र होइन, हार नमान्ने नेपाली युवाको आत्मबल, संघर्ष र सपनाको प्रतीक बनेको छ।
Comments
Post a Comment
Thank you